Истанбул шегьердиз...

Рехъ аватна,гьатна ингье, зи сефер,
Истамбул ,зун мугьман я ваз къе,шегьер.
Хъуьтlуьн кьулаз жив чирагъдив къвекъведай
Ваз-саламар хьуй живерин уьлкедай.
Шумал буйдин лацу верхин ттараркай,
Ял тlакьурдай аязрикай,гараркай
Ягь чинавай къумрал дагъви рушаркай,
"Лезгинка"дал лув ахъайдай къушаркай,
Вацlарикай,физвай рагар пад-падиз,
Булахрикай,са тав къайи кьуьд-гатуз,
Урусатдин тамарикай,чуьллеркай,
Рикl дустариз ахъа тир чи эллеркай
Атанва зун къе ви чилиз салам гваз,
Гьал лагьана,ви гьалдикай хабар кьаз...
Гьикl ава вун,къадим шегьер,гьикl я вун?
Гьихьтинди я ви майданрин къе къугъун?
Секин яни вун чуьхуьзвай гьуьлер а,
Навар гузвай туьрк рушарин вилера?
За лугьудач тарихрикай,фейи а,
Фейибуркай рахункай зун къайи я!..
Нин балкlан я ви куьчейрай тефейди,
Гьи паччагь я,низ вун туна...хъфейди?
Ва вил тахьай шагь хьанатlа чилерал?
Ша текъвен чун къе тарихдин гелера.
Кин тамир на жуван рикlик садазни,
И чкадал са чешне хьухь гьа зазни...
Зи халкьдини гзафбуриз кьин кьунай,
Зи чилизни гьахъсузвилер акунай...
Гвадарун ша,тарихдакай рахунар,
Кеф чlур тийин ийиз сециз къехуьнар.
За ваз гьакl са дуст хьиз салам гъанва къе,
Са дуст хьизни вунани зун тур рекье.
Тарихар ваъ, рикl ахъайдай шейер лагь,
Са шаркъи* лагь,са туьркуь* лагь,шиир лагь!
Зунни рахан ваз кьил рехи суваркай,
Чи лекьерин такабурлу луваркай.
Лирлийрикай,заз кьепlинал ван хьайи,
Баядрикай,кlанивили чан гъайи.
Хабарар гун ви хцикай,ша,за ваз,
Суруз фейи,рикlе гьижранд гъам аваз.
Назимакай гъанва за ваз саламар,
Вакай яргъаз дар хьайидан,аламар.
Дарих тушни вун шаирдин лаф*унихъ?
Къарих тушни вун ви хцин гафунихъ?
Ваз чидани ватансузвал вуч ятlа?
Къарибвилин гужсузвал вуч гуж ятlа?
Ватан аваз ватансуз хьиз кьена ам,
Вун ахквадай тек умудди хвена ам.
Къакъатунин цlайи кузва сар адан,
Душмандизни кьисмет тахьуй пар адан!
Адан руьгьдиз умунардай гафар лагь,
Аян хьурай суруз адан,эйваллагь*!
Фейитlани ватандикай зарул яз,
Руьгь секин хьуй,баришухдин гараллаз.
Зи уьмуьрни алатнава зуралай,
Муьгьлет хьана акьуртlа а сурарал,
Салам гуда адан суруз зани гьакl,
Вакай гзаф-Истамбул,рикl кlевиз яхъ!
10-12.02.2021 г. Истамбул