Дидедин гьуьмбетдин вилик

Къванцикай атlанвай гьуьмбетдин патав,
Инсанар кlватl хьанва,къалабулух я.
Гатфарин къацувал,рагъ хъуьрезвай цав,
9-май я къе,тарихдин югъ я.

Жегьилбур,кьуьзуьбур,дишегьли,итим,
Секиндиз къвазнава гьар сад са пата.
Гьуьзуьрдик атай хьиз,квач рикlерик чим,
Шадвилин тав галач аялрик гьатта.

Кьуьзуь кас,хур вири орден,мидал тир,
Виридкай хкатна,яргъаз я са кlус.
Са гъвечlи аялдиз,рахазвай хьиз сир,
Къат жез мукьал-мукьал,ава жаваб гуз.

Аялди жузазва нубатдин суал:
"Къванциз элкъвенава и диде вучиз?"
Кьуьзуь касдин рикlе гьатзава са тlал,
Ама вуч лугьутlа аялдиз,течиз.

Аял килигзава кьуьзуьдан чиниз,
Жаваб гана кlанда,катдай рехъ амач.
Санлай регьят хьана,жаваб жагъай хьиз,
Патав аял тирди рикlел аламач...

Вилер яргъарава,атlугънава чин,
Япара пад жезвай мермийрин ванер.
Кичlе жез акурдаз вилеравай кин,
Чир жеда рацlамри паддайди къванер.

Рахазва чеб-чпихъ галайди хьиз ам:
"Инсанрин амалри авунва ам икl.
Рухайрин кьиникьиз гун патал давам,
Къван хьана,ракь хьана кlанда дидед рикl!..

Бес жезвач инсанриз икьван кьиникьар,
Гьар сефер къавгъадиз багьна ава кьван..."
Лагьана липl жезва,саки зурба ттар-
Саки хьанвай хьтин вичикай са къван.
25.03.2021 г.