Н. гьикметаз
Кьуд пипlерин лацу къван я чилиз ганавай.
Ракъунин ал нурар алаз,рlапlрапlиз кузва,
Гьуьлуьн гуьзгуь,и кьил-а кьил акай хьанавай.
Феврал я къе гъенеллайди,хъуьтlуьн пехъи варз,
Гачалдин кьил кудай амма цава рагъ ава.
Са куьлуь гар кьадардихъни гьуьл тамарзи яз,
Лепеяр гун тийиз,вичиз секин ксанва.
Зун гагь гьулуьз килигзава,гагь вилик-рекьиз,
Тади къачу тийиз кlусни экъвезва ина.
Вилер санлай желбзава зи са къванци вичиз:
Кьве цlар шиир-кlаникайни заз тlвар акуна.
"Са кlерецдин тlар я зун Гуьлхане паркина,"-
Зи япара гьатзава ван шаирдин гьаман.
"Я зун авач фаркьина,я полис фаркьина...",
Дамахиз я къе шаирдин гафунив ватан!
"Зи пешер зи гъилер я-виш агъзур гъил ква захъ"-
"Хъша",- лугьуз эляйдай тlа хьаначир гъил ваз?
"Виш агъзур гъил хкlурзава,Истамбул,за вахъ,"-
Къариблухда чарадан гъил,кьена,гъилеваз.
Къариблухда "ватан,ватан " лугьуз чан гайи,
Са шаирдин рикlин гьарай къвезва заз ингье.
Винел "хаин" тlвар алаз,вич шем хьана кайи,
Стlал-стlал,легьзе-легьзе-миллетдин рекье.
Гьим хьанатlа "хаин" лугьуз къарар гайиди?
Нихъ жедатlа а ихтияр-жаваб чидач заз.
Мусибат я,шаир,амма и ваз хьайиди -
Суруз гъурбат кьисмет хьайи,ватан рикlеваз...
Истамбулдин цава гьиссна ви руьгь за,шаир,
Ни ватандиз къарши рикlе кинар хвена хьи?!
Геж ятlани,дидед патав квахьнач ви къадир-
Тек-туьк женгчи чан аламаз игит хьана хьи...
Гьакlни вун геж чир хьанава ватандиз жуван,
Авахьайди ви дамаррай михьи,саф иви.
Гьамни бахт я,гьармасадаз кьисмет жедач кьван:
Вавай хквез хьаначтlани-гаф хтанва ви!
06.02.2021 г.
Истамбул
Свидетельство о публикации №121042604180