Рикlелхкунар...

Гьар гатфарин алукьдай чlав атайла,
Зун хиялри хутахда мад яргъариз.
Бязан лапни гьижранди рикl гатайла,
Хъфида зун аял чlаван йикъариз...

Не,хкудиз я рагъ,чими нур гузни,
Чил кьунавай серт аяздин галтlамар.
Дамларикай куьрс хьанавай муркlуцlри,
Паруд кlане ягъизава далдамар.

Са къан къене дегиш жезва тlебиат,
Чилер аку,кьуд пад къугъун,гьевес я.
Хъуьтlуьн лацу гебе гватиз,жезва кьатl,
Хкаж жезвай бугъ гатфарин нефес я.

Хкатзава чилин чlулав гачалар,
Кичlез-кичlез акъатзава беневша.
Дегиш жезва кьуд пад кьилел кlвачелай,
Чара шикил гьатиз чилин винел са.

Кел-бацlидин ван гьатнава гъенера,
Гьисзавай хьиз ни-ял,къацу мезрейрин.
Амма фад я,акъуддач и гъилера
Ийесиди-гуьзетда са герени.

Кьуру хъапак накьв чализ я цlару кlек,
Хъел кватlа жив ама лугьуз чилера?
Цlегь-ккlанвай ичинд тарцин са хилек,
Ийесидин лаш акьадал къуьнера!..

Векь парама,кlукl алама таядал,
Хеб-дана нез элкъвенава,тараш я.
Ийеси мад акъвазнавач къарадал-
Къе-пака мад къацу жеда уьруьшар.

Кицlин са кlвач гардандалла са гьавур,
Чим акьазни агъваз ятlа квай нетlер?
Верчерин гьин,синида цlвегь,гьатна цур...
Хиялрамай шикилар я,зи кьетlен!..
18.03.2021 г.