Дидедиз!

Виридалайни ширин мез, хъуьтуьл гъилер, виридалайни   назик сес,  кьарайсуз рик1 авайди ДИДЕ я. Кьеп1инин кьилихъ,  ахвар хана, биц\еказ лайлаяр ягъайди, бала къецелай хквез геж хьайила, вилер рак\арал алаз кьарай ат1айди,  веледрин  пакадин югъни, вири уьмуьрни экуьди, бахтлуди хьун патал ширин чан къурбанд ийиз гьазурди ДИДЕ я.

Играми ДИДЕ, за ваз ва вахъ галаз вири дидейриз Дидейрин йикъан сувар мубаракзава! Къуй куь вилерал садрани накъвар тахьурай. Жез хьайит1ани, къуй абур анжах куьне хана,  тербия гайи, ч1ехи авур балайрин агалкьунрал дамахзавай шадвилинбур хьурай!

Дуьнья  ислягь хьурай, дявеяр тахьурай. Еке зегьметар ч\угуна, к1вачел акьулднавай, дуьзгуьн тербия, рик1ин  чими гьиссер гайи веледрикай  ватандиз, халкьдиз вафалу веледар хкатрай! Куьн гьамиша сагъдиз, к1убандиз акун зи мурад я.

Диде, вун заз акур чIавуз,
Вилик къвезва пак Шалбуз дагъ,
Тик кьил хкаж хьанвай цавуз,
Чина авай  умуддин  рагъ.

Михьивални паквал виниз
Кьазвай кьилер рехи я куь.
Акур кьванбур иливариз,
Хуьзвай  рикIер чIехи я куь.

Сад инсан я, масадни -дагъ,
Сада гузва заз кIевивал.
Вун балайриз - майвадин багъ,
Эбеди я ви кIанивал.

                     * * *
Диде, вун чи рагъ я, варз я, дамах я,
Ч1ехи авур, дуьз рекье тур балаяр.
Чун са беден, са иви я, даях я,
Чи патай ваз бул жеда дуьаяр.

Ваз к1андачир т1вет1 фена чи кьилелай,
Югъ-йиф ийиз сад Аллагьдиз дуьаяр.
Куркурдин хьиз зар алахьиз мецелай,
Сагъ-саламат хьурай лугьуз балаяр.

Ви са хъуьруьн са нурдай я ракъинин,
Экв гьатдай чи рик1е-к1вале, диде чан.
Ви са темен дарман я чи дердинин,
Сагъ хъийидай чун гъил-гъиле, диде чан.

Къалин хьана зи дидедин фикирар...
Амукьайди шикилар я баладин.
Йикъар физва ийиз гзаф зикирар,
Кьадардилай элкъвез женни худадин.

Гъам ч1угвазвай вахтсуз хъфей веледдин,
Сабурлу хьухь, азиз диде, минет я.
Рик1 секин туш, хабар я заз, гьелбетда,
Баладин руьгь авай чка женнет я!

Дердисар къар тахкурай ваз чилерал,
Кьилел даим экуь цавни рагъ хьурай!
Шадвилинбур хьурай накъвар вилерал,
Рик1 хуррамдиз, вун чахъ галаз сагъ хьурай!