Рекьимир ч1ал!

Виридуьньядин дидед ч1аларин йикъаз талукьарна Мегьарамдхуьруьн райондин Буткъазмайрин культурадин к1вале "Рекьимир ч1ал!" лишандик кваз мярекат кьиле фена. Аниз аялар, школадин муаллимар ва хейлин диде-бубаярни атанвай.
Хуьруьн юкьван школадин дидед ч1аланни эдебиятдин муаллим Букарова Фатума Казумовнадин регьбервилик кваз тешкилай мярекатда сад, кьуд, ругуд ,муьжуьд ва к1уьд лагьай классрин аялрини иштиракна.
Алирза Саидован, Фейзудин Нагъиеван, Ханбиче хаметовадин, Арбен Къардашан, Абдулфетягьан, Желил мурадалиеван ва маса бажарагълу шаиррин ч1алакай кхьенвай шиирар к1елна. Абуру гьак1 чпихъ сегьнеда къугъунин устадвилин бажарагъ авайдини къалурна. Исмихан Къадимован "Вот,юлдашар" шиир, Абдулбари Магьмудован "Туьтуькъуш" гьикая, Байрам Салимован "Асиятан жалоба" шиир сегьнеламишна,
хуьруьн культурадин к1валин регьбер, "Дагъустандин руьгь" ва маса фестивалринни, килигунрин гъалибчи -лауреат,медениятдин к1валин директор Мегьамедов Айдуна чуьнгуьрдал тамамарай авазрихъ галаз манияр лагьана ва кьуьлер тамамарна.
Мярекатдиз атанвай мугьманри аялриз ва муаллим Фатума Казумовнадиз тарифдин келимаяр ва аферин лагьана.
Дугъриданни, Ф.Букарова вичин пешедиз вафалу муаллим я. Ада тарсарилай къецяй аялрихъ галаз дат1ана алава к1валах тухузва,дидедин ч1ал к1анарзава. Ахьтин муаллимар амай кьван чи ч1ал садрани квахьдач !