***

ЗИ АЯЛ  Ч1АВАН
ЙИСАН  Ч1АВАР

(Селегьан гуьнедиз
     бахшзава)

Я чи к1вализ
Мукьвал хьайи,
Къуза патан
Тик тир гуьне.
Аял ч1аван,
К1вачик хьана,
Девран фейи
Асул бине.



Карагзава
Гуьнедин хур,
(На лугьун адал
Алай махпур.)
Фараш хьана
Гатфарин ч1ур,
Курум-курум
Чигеди кьур…
Хъийизмач за
К1елер чукур,
«Ппррит!»- лугьуз,
Вилик кутур.
Ц1ингав ягъиз,
Нез ана  ч1ур.
Абрун гьалдин
Къайгъу акур.



Карагзава
Чими тир гад.
Адаз авай
Чаз гудай дад:
Гъвеч1и гапал
Меред валар,
Птулкаяр
Гваз аялар,
К1ват1из мере,
Ийиз ац1ур…
Югъди жедай
Чун кьаз «чахур».
Амач валар
«Бегьерди» кьур.
Гьа сифтедай
Хамвал акур.



Карагзава
Баркаван зул.
Хъчар жедай
Гуьнеда бул.
Биц1и чанта
Аваз къуьне
Жедай тир зун
Дедин геле.
Ат1уз курквач1,
Тегьмез, тере…
Куьмек гудай
Жедай жуьре.
Т1еам-дад къвез,
Ава къе зун.
Верц1и жеда
Афар зулун.



Карагзава,
Дуьм лацу жив.
Гарухъ галаз
Гуз жедай къив.
Бармак кьилел-
Куьрсна япар,
Бегьле гъилел
Деди хранвай.
Дахдин шарф –
К1евирна туьд,
Муьт1уьгъардай
За мекьи кьуьд.
Кучуд жез гагь
Живедик гъел,
Ялдай гьа  за
Гуьнед пелел.
Югъ -нисеналд
Авхьдай зун.
Акатдалди,
Захъ, мекь, зурзун.



Ингье къе зун
Ваз я мугьман.
Гьайиф, инра,
Амач сес-ван.
Хуьр куьч хьана,
Адан макан,
Дугун хьанва,
Асайиш хъсан…
Вахъ цигел яз
Атанва зун.
Ахкун патал
Мад садра вун.
Зун хьиз вунни
Хьанва дегиш.
Уьмуьр я чи -
Муьт1уьгъ, вердиш…

2016 й. Август.

Гъилин хат1арин дафтардай.