Мецикай баллада

МЕЦИКАЙ БАЛЛАДА
Атана мез дегишардай къарардал,
Акъатналда сад мецерин базардал.
Ацlанава ,не мецерив дакl я хаз,
Маса къачу гьихьтин кlантlа мез жуваз.
Агатна кас мецер гузвай кьуьзекав:
-Рахух,-лугьуз,-вуна гузвай мецеркай!
-Гьич авани идалай са кар регьят?
Къалурда ваз мецер вири за исят,
Гила сад-сад абур инал за гъида,
Хкяйна яхъ хуш атайди эхирда!
Лагьана,ам муьштеридиз килигна,
Муьштери мез хкягъунал илигна.
Хьана ама мецер сад-сад рахуриз,
Гьар мецик са айиб,пехир жагъуриз.
Садаз лугьуз:ви рахуник галач кьел,
Садаз лугьуз:-акъвазайнал гъида хъел.
Садаз:-шитвал пара я ви,-лагьана,
Садаз:-туькьуьл я вун,-тамгъа ягъана.
Садаз:-верцlивили зун лап икрагьна!
Садав:-кисмир икьван,-лугьуз квяйна.
Садаз:-бушдиз рахазава пара вун!
Садаз:-хвемир на гафунин къаравул!
Садаз:-кубут!,-лугьуз хьана,цlвагъ-цlирна,
Садан гзаф миливили тасирна.
-Сир хуьдач на,-авуна сад тахсиркар,
Къехуьниз тир адаз рикlиз асирвал.
-Кlараб квач вак,-авуна са мез батlул,
Садаз лугьуз хьана:-квач вак бубат тlул!
Жагъанач са вичиз кlандай мез адав,
Вахгана чин чlурна,мецер кьуьзуьдав:
-Са вижевай мез авач ви базарда,
И мецерин гьармасад са азар я!
Хъуьрена а агьил касдин пlузарар,
Муьштеридиз лагьана икl:-элгьазар!
Са зи мецер тахсиркармир вуна,ша,
Жувандални вил алаз хьухь гьамиша!
Вун абурив гьикl агатна рахана,
Ви тегьердив рахаз,жаваб хгана.
Гьин къилихдив рахаз хьайтlа садав вун-
Вилив хуьх на вазни гьахьтин жаваб хьун!
25.02.2021г.