Килигзава цавай чилин йифиз зун,
Ажайибдик эквер кузва гъетер хьиз.
Аламатдин кlвалах ятlа и акун?
Вилер ятlа аквазвачир кьетlендиз?
Аватай хьиз зун махарин алемдиз,
Акъатзава гьакъикъатрин часпардай.
Бежягъат къвез идан тесвир къелемдиз,
Жедач чlугар,и мензера ашкардай.
Саки гьуьлуьн паччагьлух я агъана,
Налугьуди цин кlаник са шегьер я.
Паччагьд рушан мехъер ятlа къе ана?
Мейхуш эквер лепе гузвай тегьер я.
Гьерекатда ава вири,агъвазва,
Къалабулух,мел-мехъер я,кьилер я.
Гьуьлуьн кьене са тамаша къугъвазва,
Кузвай эквер цин перийрин вилер я.
Гьайран хьана кlаник галай суьгьуьрдал,
Зи хиялри лув ганава цавариз.
И суьгьуьрдал вегьенава муьгьуьр за,
Чlугазава леззет къенез,гьава хьиз.
Заз вилери,чара затlни такуна,
Къалурзавай ийер сегьне махарай.
Залан чархар кlеви чиле акьуна,
Кувудна зун хуш хиялрин ахварай...
20.02.2021г.
Мензара
© Copyright: Намик Фарзалиев, 2021
Свидетельство о публикации №121030205708
Свидетельство о публикации №121030205708
Рецензии