Куьн я!

Зи кьилин винизвал, руьгьдин  дамахар,
Юкьван тар, аманар, мягькем даяхар,
Умудар, иманар,  керчек тир  дустар,
Куьн тушни рушни хва- к1ани балаяр,
Квекай яргъал хьурай къада-балаяр!

Вилин нинеяр зи, рик1ин ягъунар,
Дердер-гъамар эхун, дуьня кьат1унар,
Руьгьдавай секинвал, шадвал, агьу-зар,
Куьн  патал тушни бес, к1ани балаяр,
Квекай яргъал хьурай къада-балаяр!

Хуш гатар-гатфарар, бул  мублагь зулар,
Ватандин   бахтавар  мили яйлахар,
Миргери яд хъвазвай ац1ай булахар-
Куьн я заз, багърияр, к1ани балаяр,
Квелай яргъал хьурай къада-балаяр!

Килиг, агатнавай а вацрав  гъетер,
Алемдиз рапрапиз хъуьрезвай эквер,
Ярари п|агь гузвай суварин цуьквер,
Куьн тушни масанбур-к1ани балаяр,
Квелай яргъал хьурай къада-балаяр!

Багьа тир ивирар, девлет, такьатар,
Амукьдай пак гелер, зи гьакъикъатар,
Аллагьдин паяр заз , заха савкьатар,
Куьн тушни верц1ибур, к1ани балаяр,
Квекай яргъал хьурай къада-балаяр!
Теране Керимова Оруджева.
19.01.2021.