Тамиладиз!

  Сажидин Саидгьасанов.

Хайи хуьре, авур хъсан кIвалахрин,
Дидеди яд гъайи земзем булахрин,
РикI ацукьай Женнет чIурар яйлахрин,
Ухулжуван марал ятIа, Тамила?

Гьар са шиир руьгьдин гуьзел къашарин,
Вилер хьтин, ашукь хьанвай рушарин,
Вунни, гьелбет, цуькведавай яшарин,
Ухулжуван марал ятIа, Тамила?

Гагь хизанди, гагь багьа тир аялри,
Гагь шиират, муьгьуьббатдин хиялри,
Тухузвай вун, лезги халкьдин магьалри,
Ухулжуван марал ятIа, Тамила?

Тек-туьк жеда дишегьлийрик магьирар,
Гьар са цIарцIин гуьзел гъидай эхирар,
Икьван гуьзел туьк1уьрзавай шиирар,
Ухулжуван марал ятIа, Тамила?

Сажидина, ви шиирар хуш хьанвай,
Илгьам булах рикIе авай руш хьанвай.
Шииратдин цава лув гуз, къуш хьанвай,
Ухулжуван марал ятIа, Тамила?




Сажидин бубадиз ! Тамила Салманова.

Аквазвайди гьар са тесниф,
Лайих касдин ийиз тариф,
Экв садрани тахьуй зайиф,
Сажидинан вилер сагърай.

Зи ц1арариз гайи кьимет
Ви патай заз ч1ехи гьуьрмет.
Зун паталди ч1угур зегьмет
Буба, ви гьан гъилер сагърай.

Шаир Сулейманан ватан
Къайгъударвал гьар са патан.
Югъ-къандавай жезвай уфтан,
Вун къекъвезвай чилер сагърай.


ТАМИЛАДИЗ ЖАВАБ. Сажидин Саидгьасанов.

Ви патай заз авур гьуьрмет,
Къимет гун яз, чIугур зегьмет;
Багьа ам, я зазни, гьелбет,
Гьуьрметлу хтул, Тамила!

Шаиррал шад тир гьар жуьре,
Магьшурзавай, Ахцегь, Куьре.
Куьн хьтинбур жен гьар хуьре,
Къиметлу хтул, Тамила!

Шииратдал ашукь ксар,
Лезгийрихъ жен жегьил сусар.
Аферин ваз, къачур тарсар,
Жуьрэтлу хтул, Тамила!

Багьа гафар харжиз гьайиф,
Яшлу тир зи квез я тариф?
Ви буржи я вилик финиф,
Дикъетлу хтул, Тамила!

Сажидиназ вичин буржи
Чизва, акьул ийиз харжи.
Шииратдин цуьк хьиз инжи,
Девлетлу хтул, Тамила!