ЗИ ХУЬР
Зун дидедиз хьайи чка женнет хьиз са макан я,
Ана кlуфар вили цава авай сувар кьакьан я.
Цава къветре лув гузава,мирг катзава камара,
Гатфар чlавуз гъуьруьн цуькер лацу жезва тамара.
Вилин нагъв хьиз михьи вацlар авахьзава кьве патай,
Хъваз булахрин къайи ятар куьн садра мугьман шатlа.
"Уь-уь " ягъиз эверзава кlекре уьхънен пакамахъ,
Де зун исят шегьердава,пагь хуьруьк вил галамаз.
Галатна яб,заводринни фабрикайрин ванер гьиз,
Гьава зегьер-гумар незва гьакьван кlеви чанар хьиз.
Мумкинвал жен,зун шегьерда декьикьани акъваздач,
Зун са хуьрел ашукь кас я,за шегьердиз гъил гудач.
Вуч лагьайтlа,заз виринлай зи хайи хуьр масан я,
Кьисмет аваз гьина хьайтlан, ам зи эхир макан я!..
24.05.89 г.
© Copyright: Намик Фарзалиев, 2021
Свидетельство о публикации №121011109776
Свидетельство о публикации №121011109776
Рецензии