"Зи ашуник квач гъери,"-
Накъвар михьиз кьве гъилив,
Шезва гъвечlи Гуьлпери,
Ахгат тийиз цlун кlвалив.
"Илич хъувуна чlем ,ша,"-
Дидеди кьазва меце.
Яб гузавач де руша,
Аламазва ам къецел.
Бубади эверзава,
Баде ава чан-рикlиз.
Кац Мастана зверзава
Рушан патав,тум тикиз.
Ийиз хьанач ам рази,
Сабур гъиляй акъатна.
Къайи тахьанмаз рузи,
Хизан аш нез агатна.
Рушан яб цlун кlвалихъ тир,
Тlурари гьикl ванзавай?!
Ам аш незни дарих тир,
Кампотни хъваз кlанзавай.
Акъвазнавай гуьзетиз,
Ван хкведа эвердай:
"Хъжеч вич мад гьуьжетиз,
Инаддач и сеферда!"
Амма эвердайд амач,
Рахазвайбур тlурар я.
Адаз эхиз кlанзамач-
Руфунда кьуркьурар я!
Гуьлперидиз акуна,
Гьа и чlавуз кац хъфиз.
Гвадар хьана тум кьуна,
Гьахь хъавуна руш кlвализ.
"Бес вучиз вун хтана,"-
Хъвер квай сивик дидедин.
"Зун Мастана хкана,"-
Жаваб хьана веледдин...
22.10.2020г.
Гуьлперидин багьна
© Copyright: Намик Фарзалиев, 2020
Свидетельство о публикации №120121303338
Свидетельство о публикации №120121303338
Рецензии