Аявлу яшыма

Биргине-бир авлетин тас этип,мен яшамайман деп айтагъан,янгыз уьйде къалгъан ананы тилинден язылгъан шиъру.


Мени аявлу балам,
Гёз ачгъанда ярыгъым.
Дюнья мал тарыкъ тюгюл,
Бир сен эдинг тарыгъым.
 
Билгей эдинг гьалымны,
Сенсиз гюн ярыкъ бермей.
Яш чагъынгда тезленип,
Гетдинг яшавну гёрмей.
 
Къуш да сарнай сарынын,
Юрекге балгьам сала.
Юрегимни ярасын
Топлай гиччи къуш бала.
 
Билмей гиччи къуш бала,
Къайгъымны теренлигин.
Юрегиме шатлыкъны,
Къуванчны сен берединг
 
Билмей гьалек баш еллер
Ярам къайгъы тузлагъан.
Магъа гьалек бар ерлер,
Жаным буздай бузлагъан.
 
Азиз мени авлетим,
Сени излей талмадым.
Уьюбюз бош болгъанда
Янгызлыкъда ялладым

Ялладым, гюйдюм ананг,
Йылавум тюйдю ярам.
Гёзлер суратгъа багъа
Гёзьяш токътамай агъа.
 
Балам, сени балангны
Тувуп  бир гёрсем эдим.
Бугюн янгыз къалмайлы
Къучакълап оьбер эдим.
 
Яшамайман дагъы мен,
Сувгъа янгъан анаман.
Бир авлетим оьлген сонг,
Бош уьйлерде янаман.
 
Къысмат  оьзю пайлайдыр,
Кимни бизден айырма.
Къалгъанланы пайыдыр
Гетгенлеге къайгъырма.
 
Балам,барар ёлунгдур,
Женнетлени тёрлери.
Сен гелгенден сююнюп,
Женнет яйсын нюрлерин.