Туп-тфенгар агъва хьанва,цlай цикlиз,
Кьил къакъуддай чка амач чилерал...
Акъвазнама диде рекьиз килигиз,
Нагъв хквезмач кьуранавай вилерал.
Гъилер чуькьуьз,агь-уфзава бубади,
Авай са хва гуьллед вилик ракъурай.
Хиве тахьай гуьнагьриз кваз туба гъиз
Ама фагъир...хьи Аллагьдиз акурай!
Гижи хьанва чlехибур кьве миллетдин,
Фитва гузва мад амансуз дяведиз.
Инсандин хва,чилин винел зинет тир,
Чилин кlаник физ гьазур я вядесуз!..
Инсан тум туш,экьечl хъийиз чиликай,
Чили вичиз къачур чанар вахгудач!
Авачни кас,тфенг авай гъиликай
Кьуна,ибуриз акьулдин тарс хугудай?
Авай са хва фенвай дидед язух я,
Им къайгъудай туш а руфун йикедан!
Тумаждикай тир стулдал ацlукьна,
Эмирзавай-вад...катарна уьлкедай!..
01.10.20 г.
Дяведиз...
© Copyright: Намик Фарзалиев, 2020
Свидетельство о публикации №120101903334
Свидетельство о публикации №120101903334
Рецензии