Доттаг1чуьнга

  Сан доттаг1, сихлолахь ненан дог хьаста,               
  Ца кхуьуш, висарна хилалахь кхоьруш.               
  Хьо хууш хилалахь: дезар ду къаста -               
  Вай дезарш д1аг1ур бу, вай т1аьхьа хьожуш.               
 
  Сан доттаг1, даггара хьасталахь йиша,               
  Лам санна бу хьуна йижарийн безам!               
  Бусулба дин санна, ларвелахь ваша:               
  Делера, мах боцу, совг1ат дай иза-м!               
      
  Сан доттаг1, тешаме хьо суна хилалахь,               
  Механа цул деза х1ума доций хаалахь...               
  Сингаттам хьойзича, собаре верзалахь,               
  Лалург боцу сингаттам лур бац хьуна Аллахъа!               
 
  Сан доттаг1, к1иллошах хилалахь къехкаш,               
  Къонахийн масаллех, ма хуьллу, тарлуш.               
  Дуьненан дахаран некъ айхьа боьхкуш,               
  Боккха гуо баккхалахь, цараха ларлуш!               
 
  Сан доттаг1, 1ожалло со хьалхаваккхахь,               
  Делера геч доьхуш, юххехь хьо хилалахь.               
  Дика дош ца кхоош, Дела ц1е яккхалахь.               
  Со дага мел вог1у, хьо вела къажалахь...