Жинжал гъюр

      (махъв)

Сивуъ, ярхласи гъулхьан,
Багахь саб мучIу ярквран,
Гъюраз айи кIур сар бай,
Бясвин кIул – гъюрабацай.
Жинжал вуйи гьадмукьан,
Гьяспикк ккаъдайи саркьан,
Бабу кIуйи: «Я жан бай,
Читин шулив уьмрин пай!
Ихтият апIин ярквраъ,
Дарфуз кIул`инна бала».
Амма ерхьдайи гафар,
Бабу апIру миннатар.
Бай-гъюрлан аьрза-фигъан,
Гъюйи бабаз гьар йигъан.
Кьюлу пиган: «Жанавар!»
Гъюру гъапи: «ГучI адар!
Хьибди ярквраъ йиз мадар,
Арйир вуйич ужудар».
АпIуйи аьхю гафар,
Гъюр-абайин тярифар,
Вуйидар вари кучIлар.
Гьациб вуйи фендигар.
Фагьум гъудубгнуш аьгъдар,
Мидин гъаври хьуз шулдар.
Ачухъ ригъ али йигъан,
Дубхьну бизарна гьигьлан,
Жабгъурайи гъюр ичI`ан,
Дюзендизди ярквраан.
ЧIигънан сес «Арай, арай!»
УтIубччвну ярквраъ гьарай.
Ибшрияв, кIур, аьхир пуч,
АлдабтIу гьарин кьабуч!....
Либгур, ликриъ абсна заз,
Хъуркьай, гъапи, кюмекназ.
Гъюр дишла гъулан жакьвар,
Гъапи «Пис вуяв ляхнар»,
КIуллан швнубан илтIикIу,
Минди-тинди гъитIирху.
Уццру ликриз дилигну,
Наана вуш гъитIирхну.
Гьарайнахъди хъубкьур кьюл,
Дубгнаяв, гъапи, аькьюл.
Фикир апIур, гъит йибкIри,
Саризкьан хабар дарди.
Саб жакьвли дишлади кIур-
«ДапIну ккун ухьу сабур!
Вушра думу гьарзакур,
Гъаври хьуз бегьем гъагъир,
Кюмек шулхьа, дарш му гъюр,
ЙибкIуру гъи, дарш закур».
Дарудар зат багагьлу,
Махлукь ярквраъ уч шулу.
Лигуру гъюран гьялназ.
КIулиз фукIа дапIнадар,
Жандик саб зиян кадар,
Амма ликриъ абсна заз,
Гъябкъган уццру шлуси кIваз.
Швеъдиз, мина дуфнайи,
Рябкъюр лик, заз абснайи.
Гъяркъиган мидин гьялар,
Алдабку дубхьну гьейдар.
Гъафиган швеъ чан амриз
Гъиву кьюбан бац ликриз,
Амма гъафундар бацаз,
Абсну айи кIару заз.
Хъа дуфну хъубкьнийи сул,
Шли-вуш дапIна, гъапи, ул.
КьацIухьди адабгъуз шул,
Мици гъитуз хай даршул.
Амма швеъди гъитундар,
КьацIухьди, ваъ, ухшар дар...
ГъапIну пну гафар - чIалар,
Гьич ляхин дюз гъабхьундар,
АпIуз хъюгъну гьюжатар...
Пис шула гъюран ляхнар.
Гъафну багахьна ергюх,
Гъапи: «Маниди лик уьбх!
ШартI му дарапIиш тамам,
Хьибдар зат жандиъ аман».
Хъуркьнийи ппазйир-люкьяр,
Хьибган зиян саб тягьяр.
Шулу аьзият зазун,
Гъапи: «Агъуйин гаргун,
Гъямгъмихьди бисуз шулдар,
Пис ву гъюр-балин гьялар».
Гъабхьи гъюран юкIв хяви,
«Ккадабхъу йиз хал!» – гъапи.
Мина хъубкьру гъютIрахьим.
Гъапи «Бала дубхьнадар,
Герек дар харжи фикрар,
Зазари гъачIир адар,
Уз`ин ал гизаф дурар»…
Хъютли: «Фици бала дар?
Хъа лик цIийиб бихъурдар!
Ярквраъ гьичра гъабхьиб дар,
Шубуб лик ккайи гъюрар».
Хъана гъахьну гьюжатар.
Сари кIур, йиччв кадатай,
Тмунури, лик ккадабтIай.
Гъюр ибшур, ипну гьарай,
Язухъ шуйи, вайгьарай!
Саризра хъпехъуз ккундар,
Вуйич кIури дугъридар,
ДапIну ккуни сабабар.
Ярхи йишв гъябгъюр гьамци,
Нюкьян-гьюжат апIури.
Сюгьбат апIуз шуладар,
Илигну вари мурар.
Саб дупну ухди гвачIнин,
АтIабгур сес мяълийин.
Шуран, ярквраз дуфнайи,
Уч апIуз тIерниз дурчар.
Вари нахшрар гьергну гъуш,
Гъадаргъну наанди вуш.
Шуру, гъюрахьна дуфну,
Иццурай лик дибисну,
Адабгъур заз ликриан,
Хъасин рякъ гъапIу давам,
ЦIийиб ккебгъну чан мукьам.
Гъюрра, кьадарсуз шадди,
Гьебгну гъубшу ярквразди…
***
«А саб мисал абйирин,
Гъадабгъ мяна гафарин.
Гъафиган хатIа кIару
Ккундар гьюжатар дапIну...

Му нагълиб кайиб дарс ву -
МапIан зат гафар ацIу!
Улуп ляхин вафалу
Духьну ккундуш кас адлу».