ГвачIнин ухди гьялакди,
Кьаби бабахь хялужвди,
Адашдин машиндиъди,
Гъягъюрача гъулазди.
Разивал ади машнаъ,
Бабу аунза хабаъ.
Кивну йиз кIулик чан кIул,
Гъапи ккуни йиз худул.
Хъасин чан хулаз дишла,
Учуз теклиф апIура.
Ирчри а пичдиъ гакIвлар,
Масдин алахьуз афрар.
АлапIунча цIа зурба,
Аржлигъ картфар гъяхьунча.
Хъа уч духьну суфрайихъ,
Дурар вари гъитIунча.
Фукьан уткан вуйкIан гъул.
Гьар хяраъ шул кюкйир бул.
Гъирагъдихъ гъулан нирар,
Хъа зиихъ аьхю дагар.
ТIирхура булди псинчIар,
Багъдиъ а вичар жихрар,
Гьяятдиъ баяр-шубар,
Шулу инсан бахтавар.
Гъулаз хялужвди
© Copyright: Гюльмагомед Расулов, 2020
Свидетельство о публикации №120080808509
Свидетельство о публикации №120080808509
Рецензии