***

ХУТАХА  ЗУН
(ибрет)

Жегьил ч1аван такабур гьал
Я кьван ам вич къулай агьвал.
Гьар са куьниз гудай мажал.
Куьзуь чандиз  сед я лугьун:
-Хайи хуьруьз хутаха зун!

К1вал - югъ хьана ваз шегьерда,
Гьал уртабабрин тегьерда.
Пулар  харжна  жез сеферра…               
Кьуьзуь чандиз сед я лугьун:
- Хайи хуьруьз хутаха зун!

Рик1ел хьанач акъатай муг.
Насигьатар кьуна татуг.               
Багърияр вахъ хьана алуг.
Кьуьзуь чандиз сед я лугьун:
- Хайи хуьруьз хутаха зун!

Диде - бубад уьмуьр гьалай,
Кьве гьавадин к1вал, багъ галай
Чил, серк1верик, барбат1 хьанай…
Кьуьзуь чандиз сед я лугьун:
-Хайи хуьруьз хутаха зун!

Крар на ви кьуна заха:
Хуьре амай,  ваз тур багьа,
К1вал жунгавдик гана маса…
Кьуьзуь чандиз сед я лугьун:
- Хайи хуьруьз хутаха зун!

Гила хуьруьхъ хьунук  ц1игел          
Таб я, - гъимир вилерал шел!
Алаз к1анда и югъ рик1ел!
Кьуьзуь чандиз сед я лугьун:
-Хайи хуьруьз хутаха зун!

Дуьз я, рушар авуна динж.
Езнеяр ви хьана надинж.
Ябни гузмач гьалдиз нефинж.
Кьуьзуь чандиз сед я лугьун:
- Хайи хуьруьз хутаха зун!

Суал къвезва:  вун нин патав
Хутахин хьи, амач ваз къав…
Рик1ел хкваш кеф-жегьил ч1ав.
Кьуьзуь чандиз сед я лугьун:
Хайи хуьруьз хутаха зун!

Кьудкъадав агакьнава яш,
Амай уьмуьр – хуьруьхъ я каш!
А т1алабун, ч1ана, хиве кьач!
Кьуьзуь чандиз сед я лугьун:
- Хайи хуьруьз хутаха зун!

Ийизмайди тавакъу яз -
Кьве  юк1 алай чил аку я!
Мукьвадав гвайди къайгъу я:
- Магьрумдач ваз бинедин пун,
Хайи хуьруьз хутахда  вун.