И дагъларин живер ала кьилерал,
И дагъларин тlамар ала гъилерал.
И дагъларин миргер физва пелерай,
Чигед стlал амукьзава гелера...
Балкlанар я, акай хьана синера-
Ахъайнавай, ийесиди кьинерар.
И дагъларин булахар я гьар пипlе,
И дагъларин майил ала чеб чпел.
И дагъларин цифер гьатда ценера,
Гьамга вацlар авахьзава кlанерай.
И дагъларин цавай лекьер кими туш-
И дагъларал вил алайди тlимил туш!
И дагъларин чархар ава, хци тир,
И дагъларин ахвар жеда верцlидик.
И дагълара-къацу векьин талаяр,
Векьин кьула къвекъвез къветрен балаяр...
И дагъларин пад-къерехда дере я-
Къацу гьуьлуьз ухшар гатун береда!..
И дагълариз гзаф ава кlеви сир,
И дагълар я такабурдин ийеси.
И дагъларин ванер къвезва махарай,
Къариблухда аквада чаз ахварай...
И дагъларин руьгьни вич хьиз кьакьан я,
И дагълар са Ватан лугьур макан я!..
22.05.20 г.
И дагълар...
© Copyright: Намик Фарзалиев, 2020
Свидетельство о публикации №120052307971
Свидетельство о публикации №120052307971
Рецензии