Мулдин цуьквер ваз гъилеваз
Пак кlанивал кай рикlеваз,
Кlелун патал шиирар ваз,
Ви гуьруьшдиз зун къведа,яр!
Са къуз кьванни такуртlа вун
Яд тагай цуьк хьиз, кьурад зун.
Мус аквадатl лагь на заз чун
Ви гуьруьшдиз зун къведа,яр!
Течир касдин салам кьамир,
Жуван пак тlвар "сиве твамир".
Зун хел хайи тар хьиз тамир,
Ви гуьруьшдиз зун къведа,яр!
На заз дерт-гъам гайитlани,
Вилик цацар цайитlани,
Живер,марфар къвайитlани,
Ви гуьруьшдиз зун къведа,яр!
Зун шад я захъ кlанид хьунал,
На ярди хьиз, зи гъил кьунал.
Паркуна хьухь, вил алаз зал,
Ви гуьруьшдиз зун къвезва,яр!
Ви гуьруьшдиз зун къведа, яр!
© Copyright: Владик Батманов, 2020
Свидетельство о публикации №120052310395
Свидетельство о публикации №120052310395
Рецензии