Халонаш мустафа ганижев

           ХАЛОНАШ           Мустафа Ганижев

Ховш ма дий, саго дег1а дарбадеш,
Хьалха са маьршадеш, хий мелилга.
Х1аьта низ д1абовш, саго хул къадеш,
Вахара, сина хов, къа деналга!

Гучахь х1ама хилац дег1а лепа,
Х1аьта са хул, цун лелаш, ц1и яьнна.
Цига хилац барт, дола 1азапа,
Мишта дергда дарба саги сина?

Ховш я сина, дарбан ц1а миштай:
Безамца, йовхалца цун могардеш,
Халац цун молхаш эца, му1 кагяьй,
Нах ба, вахар дуллаш, саг хьатоавеш.

Сага дарбан, баь т1а зизаш лохаш,
Озаеш листалг, овла хоадабеш.
Даьла кхела тоавалар догдоахаш,
Ираза, з1амига листалг хулаш!

Поал лал зизилгах из хожаргвац,
Хьожаш кхетама дий-дац оалар.
Кора т1а зизаш оттадаь 1ергвац,
Даьла кхела догтийша хургвар.

Наьха кхетаче, лоамал дехь хилац,
Духьал гув т1а боалаш цар гулам бу.
Ираза, дарбаш цига даьхка 1ец –
Наха эша шоай къина барта гув.

Шеко каша йила кхетама,
Сага ца тешар д1адаргда т1аккха.
Малхбоалаш дог доаг1а хоалама,
Д1ахо ваха Даьла духьа дукха.
                16. 05. 2020 ш.