Адетар хуьн чна

Хьар кутуна фу ийиз, чаз чирайди тир бадейри.
Алугаяр гьик| ийида-къалурнай чаз дидейри.
Я тинидик гъвар кутазмач, хесетрихъ кьел галамач,
Я чаз чидай а кимерал кьегьяльвилер аламач.

Сав, нут|уфа, калар жедай гьар са ч|авуз къапара,
Исит|адив чаяр хъвадай мани аваз япара.
Амач гила т|ач чидай сад, къафундик кьел галамач,
Вучиз бес лагь, чи адетрик лезгидин гел галамач?

Экуьн кьиляй ацукьна гьик| дидейри квар агъурдай,
К|анивилив баяд лугьуз вичин биц|ек къугъурдай.
Гьазур жедай дуьдгъер галай саф тугъадин булахар,
Вут| хьанат|а атир галай мили къатух-къаймахар?

Садра т|анур кайи ч|авуз хуьрелай ни алахьдай,
Эхь, виридан сиверай гьик| ц|аран ятар авахьдай.
Т|анурда фу гьик| чрада- чи жегьилриз чизавач,
Фуни т|унут| чи хуьрериз къе шегьердай гъизава.

К|валера гам ршадайла вирида ам храдай,
Жегьил рушар сусари гьик| демерикай рахадай.
Амач я гам, амач к|ент|ер- яргъи рушан рамагар,
Вучиз гузмач, жегьизар хьиз нехиш авай сумагар?

Хъуьт|уьн юкъуз гьар навадин гуьлуьт- чуьвек алук|дай,
Акьвандал гъил алаз-алаз экуьнин яр алукьдай.
Чхра амач, амач хрун, меле мани лугьунни,
Квадар тийин адетар чи, квахьда ахпа гьа чунни.