Яраб куь патара гьава гьикI ятIа,
Гатфар атанватIа, ракъар аватIа…
Я кукIварзаватIа цIайлапанри цав, -
Ина хьиз кьунватIа цифери чIулав?
Экуьнлай атIанва чубарукдин ван,
Белки ацукьнава муквал эркиван...
Вучин бес… кан хьана тухдалди рахаз,
И вилик кьуьлзавай стIалрихъ галаз…
Къецел экъечIзава, секинариз рикI,
Марфади кутазва зурзунар чандик.
Гатазва чин чIурна, кьежирзава тан
Белки хъел къвезватIа: хъвач кIвализ, инсан!
Белки алахънава дерт-гъамар михьиз,
ЧIанади, хъсанди рикIерал хкиз?
Рази я, давамрай мадни авхариз,-
Катзавач марф закай, вун катзавай хьиз...
Б.А. 09.05.2020
Катзавач...
© Copyright: Билал Адилов, 2020
Свидетельство о публикации №120051105389
Свидетельство о публикации №120051105389
Рецензии
