Шурван пепедин демер

Ката-галтугдава куьлуь-шуьлуьяр,
Чпиррин, Ясабрин тамун эгьлияр:
Хурушум хьайила  Пирарин кимел,
Са шурван пепеди кутарвал я дем.
Деллекдин нупада ч1ехи  хуз ава,
Чепелукьди вилив  дерзи хуьз ава.
Хуьшрекан машгъул я, ацукьна текдиз,
Храз назанидиз булушка  пекдин.
Гьатнава теспача, сварар атана,
Т|илияр къвезавай цекврен к|унт|уна.
Алук|на к|вачерал  резин  калушар,
Къавал алтадзава   псидин   кулар.
Мадни  дем жедалди, марфари гатай ,
Цлар асунзава патар алатай.
Сувун цуькверилай  ч|ижери  вирт|ер,
Кват|на ац1урнава  куьц|уьяр, ц|ип|ер.
Вил ала демерал -кефер  я, кефер,
Дат|ана сейр ийиз кьиблени - кефер.
Яргундал  гагь Хьилиз лув гуз физ- хквез,
Пагьар гуз цуьквериз к1ефи ахъа  жез….
Ингье, рагъдан  хьана Кц|ар  патара,
Гила демин  ванер гьатна сувара.
Чк|анва кьуд патаз  авазар яман,
Манидар ц|иц|ерин ван векъи тир кьван!
Хкадриз макьамрал  акъатна вет1ер,
Пепеяр хуррам я ийиз валс кьуьлер.   
Кутунва халис хор  къе ч|игъич|игъри-
Аялар ксурна атай дидейри.
Эхирни  атана  шурвандин  пепе,
К|ани  ярдихъ галаз -гъил аваз гъиле.
Туракь пенжек  ала, ч|улав я т|вехер,-
Гъетер ксанвани туьхъуьнна эквер?
Са иер чепелукь  эвич|на цавай,
Пип1ер блушкадин чилерай физвай.
Жегьилрин арада   къалмакъал гьатна,
Деминиз атайбур гьар саниз катна.
 
 
Са рушан паталай дустар кк|ана,
Пагь гьайиф, вуч гьайиф - демер чк|ана…