Гьатнавай зи чанда са дили юзун,
Чарара къвекъвезвай ви атирдик зун.
Шииррин ц|арарай карагзава вун,
Цуькверал мет- мете ацукьнава чун,
Къакъатиз жен тийиз, амукьнава чун.
Гагь санал шехьзава, гагь секин жезва,
П|узарар жакьвазва, сарар регъвезва.
Гагь баяд лугьузва - шаддиз хъуьрезва,
Ашкъидин кленждал алукьнава чун,
Къакъатиз жен тийиз, амукьнава чун.
Варз чал мягьтел хьанва цавай килигиз,
Гъетер чаз авазрал ава илигиз,
Гьик1 ц1арц1е тунва чун байихри милиз,
Гьиссерин къуватдиз кумукьнава чун,
Къакъатиз жен тийиз, амукьнава чун.
… Кьат1 хьана- зурак1 я верц|и ахварар,
Вучиз гатун цик1из акъатна гарар?
Накъварай куьц|енва ктабдин чарар....
Хиялрин алемдик акатнава зун,
Къакъатиз жен тийиз, амукьнава чун.
Амукьнава чун
© Copyright: Теране Оруджева-Керимова, 2020
Свидетельство о публикации №120050610585
Свидетельство о публикации №120050610585
Рецензии