ВУЧИЗ...
Лагь вуна, зи хатур мад вучиз хана,
Цуькверин арада къалгъанар цана ?
ТIал авай са рикIин къен какадарна
Вуна гъамун винел гъам хкадарна…
Лагь вуна, зи хатур мад вучиз хана
Зи гуьнагь вуч тиртIа, тахсир вуч хьана?
Лагьанай, за хуьда вун багьа къаш хьиз…
Экуьнлай чIукI-чIукIиз, нянихъ галкIуриз?
Лагь вуна, зи хатур мад вучиз хана,
Зи руьгьдин навариз мичIивал гъана?
Жигьетар туш ибур кIанивилиз хас,
Им яни гьиссериз вуна гайи мас?
Лагь вуна, зи хатур мад вучиз хана,
За кьинер ч|урнани, вун маса гана?
Вучиз ч|угваз тазва вуна зав азаб,
Заз кьван вун кIаниди аватIа яраб?
Лагь вуна, зи хатур мад вучиз хана,
Мадни зун ви патав хьанани чIана?
ЯтIани ният саф, байихар михьи.
Якъин кьисметдава заз вири эхин ....
Вучиз...
© Copyright: Теране Оруджева-Керимова, 2020
Свидетельство о публикации №120050309508
Свидетельство о публикации №120050309508
Рецензии