Кьуд патай гъамари азаб гайила,
Диде, вун к|анда хьи заз ц|у кайила.
Дердере гьатайла ви т|вар кьаз ава,
Тек вавай заз диде куьмек к|анзава.
Гьахьдай зун жедайт|а, ви чими гине,
Эцигдай кьил рик|ел, гъилерни – гъилел.
Шехьдай зун гьарайна, вил аваз виле,
Чан диде, даях хьухь, вуна куьмек це.
Ви къадир хьана жув, диде хьайила,
Гъавурда акьуна, ахвар хайила.
Зи начагь балади йифди ц|урдайла,
Кьезил я заз вавди рик| ац|урдайла.
Хциз свас гъидайла, виридан кьилик,
Хийирда-шийирда хьанач вун вилик.
Руш гъуьлуьз гудайла сал тир чилни цав,-
Уьмуьрдин легьзейра вун кандай патав.
Ингье, зун суралла, вахъ галаз рахаз,
А ваз пара к|ани цуьквер гъилеваз.
Чан диде, азизди, дарих я зун гьикI,
Сурун накьвар акваз акъатзава рикI…
Дидедиз
© Copyright: Теране Оруджева-Керимова, 2020
Свидетельство о публикации №120050309451
Свидетельство о публикации №120050309451
Рецензии