Ингье, зун кьисметди гъанва Генжедиз-
На вад йис чирвилер къачур шегьердиз…
Алатай а чIавар рикIел хквезва,
Зун мад ви гелерихъ ина къвекъезва.
Зун гьикьван вахтар я суракьра аваз,
Ракъин нураривай тек вун хабар кьаз.
Залан я уьмуьрун икI вил галамаз,
Ама зун хиялра вахъ галаз рахаз.
Зи шад йикъариз вун гьикI шерик жедай,
Чун вири кьил тек вал эцигна шехьдай.
Амач ви гегьенш рикI, зи даях тир къуьн,
А ви уьткем къамат, а тIарам экъуьн.
Я ваз са начагьвал, я гур акунач,
Я завай пелез ви темен гуз хьанач,
Ирид юкI кафан ваз кьисметди ганач,
Я сура твадайла зун вав агакьнач…
Ингье, зун кьисметди гъанва Генжедиз-
На вад йис чирвилер къачур шегьердиз.
Хъфиз тежез ама зун кузни-хъухъуз,-
Белки ви руьгь ина аватIа лугьуз…
Вахан гьарай
© Copyright: Теране Оруджева-Керимова, 2020
Свидетельство о публикации №120050309365
Свидетельство о публикации №120050309365
Рецензии