Чубандин ахвар

„Тlукlур кlукlван” кlаник садра ацукьнай,
Хъуьтуьл шагьвар кинар ийиз галукьнай.

Ван атанай яд рахадай секиндиз,
Гьатзавай зун гъавурда лап четиндиз.

Вири сад хьиз къвезва ванер- лирлияр,
Тек са гаф я кьатlайди за- „Телли яр”.

Хиялривди агалт хьайи суст хьана,
Ахваркайни заз са гъвечlи дуст хьана.

Ргазва чил ракъин кlаник къазан хьиз,
Чк1урзава кьве жегьилди аман физ.

Парталарни алай к1усар-кlус хьана,
Ивиярни физ хирерай куьрс хьана.

Сад алукьиз, сад къарагъиз аман физ:
Яраб Аллагь вуч азаб я куь чандиз?

Муькуьда къвез кьежей шимер капашдив
Чкlурзавай кьуд патаз дирибашдив.

Яваш–яваш гьамга хьтин атана
Михьи цивди чlегъвей фурни ацlана.

Гьалчна фурал, кlватlиз кlуфув къветре хьиз
Эвиззавай рушан кlуфуз нуькlре хьиз.

Авагъ хьана фагъир аял, кlевевай,
Пlузаррив хъваз шербет хьиз яд сивевай.

Сес акъатна яргъай гьарай–эверрин,
Къал–макъал хьиз, са гьаятдал кьеверин.

Ахмакьвиляй пехъи яни инсанар?
–Телли, зи рикl, агакьзава душманар,–

Малаикдин хьиз, са ширин сес хьена,
Гьа иналди зи ахварни бес хьана.

„Теллидин булах” гьим ятlа чир хьана:
Шимер кьула гьамга хьтин вир хьана.

Гагь инсанар атай чlавуз ацlанва,
Амай чlавуз шим авахьиз кьуранва.