Гьуьлуьн кьере
Ацукьнавай шаир кьерел пашмандиз…
АкI авай хьи,и пад,а пад гатана,
Луьткве я ам элкъуьн хъувур лимандиз,
Гьуьлуьн пехъи лепейри рехъ атIана.
Шумуд югъ тир ам къвез гьуьлуьз тамашиз,
Мал батмиш хьай савдагар хьиз дегьнеда.
Зунни тажуб хьанвай кьарай амачиз:
Вуч аквазвай адаз гьуьлуьн сегьнедай?
Зун хабарсуз адан къвалав ацукьна,
На лугьуди умуддин гъед куькIвена.
Нагъв хъитIкьинна рахаз тежез амукьна,
Шаир милиз хъуьрена захъ элкъвена:
-Шумуд югъ я кхьиз тежез, гьелекдиз,
Мейит я зун, аквазватIан сагъламдиз.
Пери ят1а яраб вун зи илгьамдин,
Зи язухдай ракъурнавай фелекди?
-Играми кас, тадач за вун сефилдиз.
Къван тир зи кьин буш къумадин тепедал.
...Чи къаншарда сирнавзавай кьезилдиз,
Кьве гьуьлуьн лекь хкаж хьана лепедал !
© Copyright: Тамила Хуршидова Салманова, 2020
Свидетельство о публикации №120042201829
Свидетельство о публикации №120042201829
Рецензии