Анам, исси къолларынг
Сыйпасам исси магъа.
Аяларынг йылысы,
Ругь бере яшамагъа.
Къолларынгны йибермей,
Оьмюр бою аяйман.
Янымда онг къолумдай,
Аянг аркъа таяйман.
Гьар оьтгерген гюнюнге
Насипли гюнлер батсын.
Гьар алгъан тынышынга
Рагьатлы танглар къатсын.
Гьар басгъан абатынгда
Гюллер оьссюн тюзлеге.
Гьар берген насигьатгъа
Кюр гемедей юзмеге.
Денгиз эркин дерия.
Толкъунлар яйнай магъа.
Кюр гемедей юземен.
Анам бар ягъалагъа!
Анам бар ягъалагъа
© Copyright: Насият Даибова, 2020
Свидетельство о публикации №120042100838
Свидетельство о публикации №120042100838
Рецензии