Лагь, сумаг, заз...

Кьуланфер я, ахвар фена аршдиз,
Руьгь экъвезва фейи сарин гелера.
Аруш жезва фикирар зал, кашу хьиз,
Верцlи...залан...тваз хиялрин хелера.

Ксанвай хьиз, аквазвай хьиз ахварай,
Са кинодиз килигиз я зи вилер.
Ингье, къегьне ичlи акур агъварар,
Рушанава кукlва кьадар мад гъилер.

Дидени вах ацlукьнава гамунихъ,
Кваг ягъиз я, илме-илме гилигиз.
Мукьал-мукьал лугьуз:"Кьала ам иних, "-
Чешнедин чар дикъетдивди килигиз.

Элкъвей цлар хранавай сумаг я,
"Дагълар авай", "фурар авай", " цуькерин"...
На лугьуда гьакъикъат туш, са мах я-
Вилиз акваз,кужумзава рикlериз.

Ингье, хзан,чlехи-гъвечlи, ксанва,
Диде текдиз давамиз яз вичин кар.
Ахвар къвезва вилериз,гъил ацlанвач...
Муьргуь язва, кьил эцигна куьжуьдал.

Яргъал тефиз,хабар жезва, мад гьаман
Ян тухузва, киркlит гъилиз къачуна.
Дуьз хъийизва гъилив вичин пелеган,
Бес я къенинд...жедач гьевед ван туна.

Экуьн кьиляй мадни вири месикмаз,
Къарагъда ам, мал-къарадиз килигда.
Кардал физвай гъуьлуьз тlуьн-хъун эцигна,
Гамун кlаниз фидай мажал гъиликда.

Са геренлай аяларни къарагъда,
Тlуьн-хъун гана гьим мектебдиз ракъурда.
Гьим гъвечlи я, адан наздал къугъада,
Багъ-бустанни дидед хиве амукьда...

Уьмуьр фена гьикl хзанрин къайгъудик,
Икьван куьруь тирди ам заз чидачир.
Амукьдач ам...фикир рикlик агудиз
Жедайни-гьич хиялдизни къведачир!..

Вучда вакай ам амачир чкада,
Гьар вун акваз кьазва зи хур къагьарди.
Заз акl я хьи вун цlуькl хьайтlа, аквада
Диде жегьил-гьакъикъат жен ахвар зи...

Ви кваквара аквазва заз гила ам,
Ви нехишрин наварама зи диде.
Вахце вуна, вахце адан гьар са кам,
Ви илмейра цlранава зи диде.

Ихтилата гьич тахьайтlа,сумаг, заз,
Лагь ви кlане шумуд йифер чlичlнатlа!
Хьанани гьич садра хьайтlан хабар кьаз,
Шумуд дерди лугьуз тежез,киснатlа?

Гъвечlи хьана, акьулди вуч кьатlудай,
Гила акьул хьанва-диде зи амач!
Лагь тlун, сумаг, са гаф, зи вил атlудай-
Белки рекьин зи гьасретдин туькьуьл каш...
19.04.20г.