Галчур хьана хъфена югъ чилерлай,
Йиф эвичlна цавай вичин мичlер гваз.
Чилин язух атана жаль, кьилелай
Нур цикlирна, хъуьрез ава цава варз.
Гъед гъетева цавун чина, кьуьлериз,
Саки ава сад муькуьдан бягьсина.
Чун бес вучиз муьтlуьгъ хьана хъилериз,
Къакъатнава- гьатнава куьн нягьсина?
Чин гьуьлуьхъна, ацlукьнава икlа зун,
Чим галама къерехдаллай къумарик.
Гьина жеда, вучиз жеда пака зун,
Чидач-исят пелеш я, кваз гъамарик.
Белки вунни зун хьиз исят уях я?
Белки вазни аквазва и лацу варз?
Вацран экв я, амма зи къен сиягь я-
Ваз идакай къайгъу жеда, чидач заз.
Лепе гузва,варз хуьрезва гьуьлевай,
Адаз цавай аквазва чун авай гьал.
Лугьузватlа, ахъайна бахт гъилевай,
Алачирнал кутаз я чун рикlик къал?!..
16.04.20г.
ЙИФ
© Copyright: Намик Фарзалиев, 2020
Свидетельство о публикации №120041605356
Свидетельство о публикации №120041605356
Рецензии