Бязи папар

   

Югъди заз жезвач мажал,
Фикирдаваз хзан,к1вал.
Яраб ят1а зун темпел,
К1валахра гьал жез энгел?

Бязибуруз жеда вахт,
Белки,гьахьтин ава бахт.    
Мажалдив, югъ атана,
Куьчедава дат1ана.

Гьар са дерди агудиз,
Крар кьилиз акъудиз.
Абур гьикI агакьзава?
Залай куьз алакьзавач?

Масад я хьи гьакъикъат,
Зирзибилдин хъурт-гьаят.
Авайди туш  михьи к1вал,
Къайдадик квай туьк1вей сал .

Хъсан-писда вил твада,
Ина ана кьил твада,
Акатайна  ава  тIиш,
Гьа саягъ хьанва вердиш.

Таза фуъ-къафун герек,
Хзандиз чими хуьрек.
Виликди гъун адет туш,
А папарин хесет туш.

Чуьхуьн тийиз кьарада,
КьацIай къапар харада.
Акурдан лап зегьле физ,
Меслят гурай вуна низ?

КIандай шей нез хушуниз,
Туьквендин рехъ тIушуниз,
КIанзамач верч-цицIиб хуьз,
Салаз фена пер ягъиз.

Дуллу хьайла хук-руфун,
Ч1ехи дуст я телефун.
Чизмач хатур ва гьуьрмет,
Юлдаш хьанва интернет.

Нагагь акурт1а ам квез-
Куьруь юбка, яргъи мез !
Рахадайла-тапарар,
Гьалтзава гьахьтин папар.

Югъ-йикъалай батин я.
Хзандин кар четин я.
Мягьтел я зун гъуьлерал,
Кьазвай абур гъилерал.