Азиз дишегьлияр...

Азиз дишегьлияр, и гатфарин къуз,
Гевилар куь хуш хьуй, руьгь гумрагь хьурай.

Суварин югъ я къе, амма квез даим
Уьмуьрдин рекьера цуькед багъ хьурай.

Вучда,вуч хъийида... лугьуз тахьурай,
Кlвачерик кlеви чил,далуд дагъ хьурай.

Цифери кьаз тахьуй рикlеравай рагъ,
Гьамиша куз хьурай ам, тlуракь хьурай.

Чlехиди, гъвечlиди, кьепlинавайди-
Авладар вилерин нур,чирагъ хьурай.

Веледрин усал къар акваз тахьурай,
Гьамиша абуркай хуш сурагъ хьурай.

Куь хатур хадайбур, куь рикl кудайбур,
Виждандин цlаяра кана,тlагъ хьурай.

Кlвалахар авандрай,фу кьел квайди хьуй,
Берекат,мал-девлет куь мублагъ хьурай.

Хуш ниятрив къведай мугьман хьуй кlвале,
Гъамаркай, дердеркай рикl кьурагь хьурай.

Агьилбур хтулрин хьуй къайгъуйрик кваз,
Жегьилрин рикlера ашкъид рагъ хьурай.

Ийизвай кlвалахар рикlерай яз хьуй,
Ахварар верцlи хьуй, чанар сагъ хьурай.

Зегьметар чlугурай мел-мехъер тухуз,
Юргъун хьуй,галат хьуй,мад къахрагъ хьурай.

Итимрин кьил даим хкажрай куьне,
Куь ийервилиз мас намус, ягь хьурай.

Фитнедин рагьулра гьат тавурай куьн,
Исметни бакирвал квез пайдагъ хьурай.

Кlанибур куь вилик батlул хьайитlа,
Эхи гуз сабур хьуй, рикl фирягь хьурай.

И чилинни цавун арада масан
Аватlа вуч-гьадахъ ахъа рак хьурай.

За рикlин ситкъидай лугьузва къе квез:
Куь къенин суварар мубарак хьурай!
08.03.2020 г.