Лайзизаш хьахиннад ара,
Латт уж кортош чуэхка,
Керда нускалаш мо – къаьра
Долаш хулача «бехка».
Гурматалгаш я тIаяьнна –
Шо-шоай къаьста дезилгаш,
Царца аре я гIозъяьнна,
Цкъаза хьедеш ловзаргаш.
Эзза, диткъа да цар гIовнаш,
Баьццара да дувхараш.
Керта мос а, юхь а къовлаш
Да кIай беса корталеш.
Хетт уж – гIалгIай Iадат кхоабаш
Бола керда несарий,
Эздел шоашца шортта хоалуш,
Ховха кхийна мехкарий.
Иштта хоза сурт да доалар,
БIаьстена юхьиг яле а,
Коа тIа, ара ваьлча хьагур –
Мелла бIарза хьо вале а.
05.03.20.
Лайзизай сурт
© Copyright: Аслан Куазо Ингушетия, 2020
Свидетельство о публикации №120030700694
Свидетельство о публикации №120030700694
Рецензии
