Заманан куьзга Зеркало времени

               
Генарчу  Г1ум-Азехь со кхиъна йог1уш,               
Хи санна доьдура шераш лар хьош,
Сийлахьчу  Ковказе сатийсам богуш,
Олура  дас-нанас б1аьрхишца дош:

Варелаш, доьзалаш, дех-ненах довлуш,
Тхох бисна, безашшехь, Нана-Даймохк,
Тха дегнаш цу лаьтте сатуьйсуш догу,
Ларбелаш, баз ца беш тха онда  мохь…

Со нохчо ю олуш  дозалла  хеташ,
Ц1ийца  ас  лардира  церан  весет:
Дадин карахь пондаран мерзаш  декаш
Тарлора  лаьмнашкахь дай  баьхна керт.

Ламанца  кхиина  зезагаш  хьоьстуш,
Узамца  нанас и  безам  балхош,
Массо  а  меттанел  хетара  ховха
Сан ненан  багах  долуш  долу  дош.

Хазачу, эсалчу  б1аьргаш чу хьаьжча,
Даимна  гуш  яра  цо  йоьтту  чот:
Лаьмнашка, йиначу бен чу д1акхача,
Х1орд санна  бекийта шен ненан мотт.

Дуьххьара Ковказан лаьмнаш схьагича,
Сирлачу  безамо  хьовзийра корт.
Эх1,сан дог,сан са-а,хьо лелла мичахь,
Махкаца мел бог1у сан ненан мотт!!!

Кхи кьаьмнийн юккъехь со наггахь нислора.
«Хьо нохчи юй?» -аьлла, стаг вистхилча,
Гергарчу  безамца  дог  тохалора,
Кьамелаца  кховдош  сайн  ненан 1а.

Хуьлура баккхирой сира куйнаш  тохкий,
Сийлахьчу Даймахкара тхоьга бог1уш,
Элий санна куц долуш, г1ода юккъе  йоьхкий,
Эвлаяийн  хьесапехь  къамел  долуш.

 Хьена ю хаьттина,- жоп дала дезча,
 Дайшкара д1абийца бух а болуш,
 Дозалла  хетара  йист хила езча,
 Оьздачу ден-ненан мотт а хууш.

Т1амо вай човхийна г1азоте дисча
Наноша кьинхетам Деле боьхуш,
Дайдора х1оьттина къемата де ирча
Доьналле дешнашца синтем а луш.

Веза Дела! Кхи наной  белха ца безаш,
Эвлаяийн саде1ар  ца  дойтуш  гатт,
Шен махкахь, шен маттахь, иллеш а декаш,
Маршонца  бекийтахьа  сан ненан  мотт !!!
         
    Роза Дахаева         09.04.2019

Произведение называется "Зеркало времени». Написано в канун дня родного языка в Чеченской республике.