Са дай баьхаб укха лоамашка
Гувнаш, аьлеш тохкаш,
Мелла халача ханашка
Хало эшо гIорташ.
Яьхай са даьша лакхаленаш,
Сигалене гIерташ,
Далла Iамал ю сийленгаш
Лоаман бухь тIа йотташ.
Баьхаб са дай замаш тохкаш,
Аьттонаш хьалохаш,
Дунен сийле керте йоахаш,
Гаргалонаш хотташ.
Мохк лорабеш, эсал боацаш,
Баьхаб эздел кхоабаш,
МоастагIашта духьал увтташ,
МоастагI цец а воахаш.
Баьхаб са дай хьалъеш гIалаш
Моархашка а кхоачаш,
Царех хулаш къаман гIапаш –
Къам лораде могаш.
Дехьа – гIалаш, сехьа – гIалаш,
Массанахьа – гIалаш…
Ужаш я сийленна вIовнаш,
Даьша хьалъяь – гIалгIаша.
23.02.20.
ГIалгIай лоамашка.
Са дай баьхаб
© Copyright: Аслан Куазо Ингушетия, 2020
Свидетельство о публикации №120022400528
Свидетельство о публикации №120022400528
Рецензии