Марални къиб...

Халкьдин арад хьанавай са,
Ихтилатда квез за, дустар.
Ибрет жедай ам я къиса,
Квез ибрет гун туш зи къастар...

Хьаналда са дагъдин рука,
Тlвехер квай са марал ийер.
Гуьрчек крчар кьилин кукlвал,
Кьве вилни тир-вили вирер...

Къацу пеш нез,къацу векь нез,
Кьуьл хуьзавай вичин ада.
Къайгъусуз тир, азад къвекъвез,
Гагь дагъ пата, гагь тlам пата.

Къаркай са къуз залум авчи,
Расал жеда-язух гьайван!
Къушалуьле туна кlваче,
Гуьлле яна,кутада ван.

Са гуьлледи кьада фагъир,
Цlай алукьда саки къвалал.
Кlватlна вичин гужар эхир,
Авчид гъиляй катда марал.

Хер залан яз, цихъ тир цlигел,
Кузвай къене ялавдин цlай.
Фейила яд хъваз кlанз вирел-
Са цlару къиб акъатна цяй.

Вирин чиниз лепе гана,
Хкуднавай хъипре келле.
Кьуркьурна ам рахаз хьана,
Хер алайдан тухуз зегьле:

-Аман, чан зи марал стха,
Вуч кlанзава и авчидиз?
Къалум хьанва залумдин хва,
Мажал гузвач кlвач къачуниз.

Вуч я адан амалдин диб,
Са инсафвал вучиз авач:
Вун марални зун маралдив,
Вуч вугана вахчу жезвач?

И гафарин ван атана,
Яд хъваз гьазур хьанвай марал
Амукьна гьакl пагь атlана,
Гафункай хер хьана хурал:

-Рекьидачир зун авчидин,
Яру ялав квай гуьлледи.
Амма лагьай гафари,вин,
Туна хьи зи рикl желеда.. .

Цихъ цlигел яз фена марал,
Са хупl ядни хъваз таххьана.
Кlвач кевяйна кьена марал,
Хъипрен вилик ярх хъхьана...
23.02.2020 г.