Шегьре-шегьре физвайла зун, пашман яз,
Са хер авай хурани зи, дак1ан яз,
Хабар тушиз, пайда хьайла, жейран яз,
Заз са багьа къизил-мармар акуна.
Салам гайи сивел мили хъвер алай ,
Шад хьана заз, са кьадар дердер авай,
Хурал лацу къизилдин цуьквер алай,
Заз атирлу, гуьзел гатфар акуна.
Пайгар я вич шефтелидин тар хьтин,
Кьилел алай ипек ягълух зар хьтин,
Ашукьд хура дуьзмишнавай тар хьтин,
Заз зи гьевес зи къаншардай акуна.
Вич акурди жеда гьейран, шад хьана,
Экъечlай к1вал нурарив, абад хьана,
Югъди-йифди вилив хуьн мурад хьана,
Заз са гуьрчек, гуьзел сувар акуна.
Акьулди к1вал бегьер гудай сал хьтин,
Тербиядиз рик1ин лап хиял хьтин,
Бахтлу я руш килигай марал хьтин,
Заз и гуьзел мадни пайгар акуна.
К1валахдайла ийиз дирибаш хьана,
Намусдизни вичикай юлдаш хьана,
Кьватидавай мержен хьтин къаш хьана,
Заз бахтунин гуьзел уст1ар акуна.
Бахтунин уст1ар акуна
© Copyright: Магомед Мирзоев Мирзой, 2020
Свидетельство о публикации №120020906139
Свидетельство о публикации №120020906139
Рецензии