Гатун чими, секин са къуз
Аламат са кар акуна,
Куьчедай зун фидай чlавуз,
Заз а куьче дар акуна.
Яру хъуьхъвер, бурма чlарар,
Са кьадар тир вичин яшар,
Дишегьлидиз авай ухшар
Ац1ай-кц1ай хвар акуна.
Кlвалин къамат ийиз ужуз,
Туширт1ани вични ялгъуз,
Тербияни такур ягьсуз,
Тинидин са гъвар акуна.
Са гъиливди куьлуьт храз,
Са гъиливди далу чухваз,
Сив алахьна, кlашкlум чlакьваз,
Вични лап санбар акуна.
Салам гайла тlиш юзариз,
Рангарни яна пlузариз,
Гагь физавай вич ахвариз,
Яраб заз нин яр акуна.
Кефи хана и гьал акур,
Дишегьлидин амал акур,
Бармак кlурзавай шал акур,
Белки заз ахвар акуна.
белки заз ахвар акуна
© Copyright: Магомед Мирзоев Мирзой, 2020
Свидетельство о публикации №120020707521
Свидетельство о публикации №120020707521
Рецензии