Гъвечlи Камил

Сегодняшние дети прекрасны
Азиз Несин

Кьве варзни зур кими яз,
Вад яш хьанва Камилаз.
Аял туш,са женжел я,
Ам тежер кьван дежел я.
Ван къвезвайд туш лагьай гаф,
Терс аял я ам гзаф.
Галай тахсир кьач хиве,
Таб я рахар гаф сиве.
Чlуру кардин,вичи кьур,
Ам вичелай гъвечlибур
Батlулариз алахъдай,
Вердиш хьанва кlвалахдал.
Ийида чlуру кlвалах:
Жеда батlул Абдулагь!
Кьазва мад са пис амал:
Тахсиркарди я Камал!
-Ни авуна бес и кар?
-Къуй и сефер хьуй Жабар...
Дустар адахъ парава,
Кlандай кьван жез тапарар!
И себебдай фад-фад ам,
Вахт вахтундал жез тамам-
И хци,цицlи гада,
Дидед кlарцlив гатада.
Вучда,мадни ар жедач,
Гатунрикай кар жедач.
Де ша туьмбуьгь жедай кьван-
Табни куьтягь жедай кьван...
Са рикlелни текъведай,
Дуьшуьш хьана,хъуьредай.
Нисин хьанвай береда,
Эхвер гана дидеди:
-Хъша,фу неъ вунани!
Хкlватl хьанвай хизанни:
Диде,баде,чlехи вах,
Чlехи буба,садни дах.
Чин-гъил чуьхуьн тавуна
Хуьрекдин физ къапунал,
Акуна ам дидедиз,
Ахмур гана веледдиз:
-Вучиз мадни чуьхенвач,
Кьарадава ви гъил-кlвач?
Камил вичиз килигна,
Гъилиз-кlвачиз килигна.
Кьацlанавай гъилер лап-
Твазвай кьарад гелер лап!
Ам дидедиз килигна,
Ам бубадиз килигна:
Чlехи буба "машгъул тир",
Баде "рахаз кагьул тир".
Кьатlана хьи,инал мад,
Кьадач садан адан пад.
Чир хьанач вуч хъийида:
Мад батlул гьим ийида?
Икl хълагьна Камила:
-Мажал ганач Жемила...
Вири адан жавабдай,
Кегькир хьана амазмай!
Тек са Жемил хъуьрезвай,
Верцlи-верцlи...ахварай.
Ксуз тир ам къетненлай,
Бадед патав,кьепlинал.ю