Куьн авайвиляй...
Зак гьевес кутур, руьгь кутур зурба,
Захъ кьве лув ава, дидени буба.
Далулихъ галай сад Шагь,сад Шалбуз,
Зи кьве стхани кьве дагъ я шаксуз.
Зи жигер-нефес архаяр я зи,
Зи кьве вилин экв рухваяр я зи.
Умуьрдин чешне,зи гьамга булах,
Зи фурсни дамах-зи гъил кьадай вах.
Зи авай са руш- ам дидедин рик1,
Зи ширин бала- зи марвардин цуьк.
Зи далда - даях,зи кьилеллай таж,
Хзандин регьбер- умуьрдин юлдаш.
Зи играми тир къелемдин дустар,
Хайи ч1ал хуьдай авай пак къастар.
Шуьрбетдив ац1ай цурун жам хьтин,
Ирид рангунин хважамжам хьтин.
Куьн авайвиляй к1ан я заз уьмуьр.
Чирна за квез зи хуррамвилин сир !
© Copyright: Тамила Хуршидова Салманова, 2020
Свидетельство о публикации №120013004133
Свидетельство о публикации №120013004133
Рецензии