Экуьн бере цlарцlар ийиз,
Цlверекlривди лацу хьана,
Кьуьд атайди хабар ийиз,
Къизилд махпур бацlу хьана.
Кlвалахрикай юргъун хьайи
Чилеризни файда хьана,
Са легьзеда чайгъун хьайи
Живедикай далда хьана.
Югъ алукьун сабур тежез,
Гъвечlи кlеретl кlунтlал ала,
Живед кьула зирек къекъвез
Са бицlекни къавал ала.
Циф акъудиз пурпу живер,
Аялриз им сувар хьана.
Кьуд патара гьарай–эвер:
Шад я кефи къумбар хьана.
Экуьн чlавуз
© Copyright: Магомед Мирзоев Мирзой, 2020
Свидетельство о публикации №120010107318
Свидетельство о публикации №120010107318
Рецензии