Мадни са йис алат хьана яд хьана,
Хкажзава чун са кlарцlиз кьисметди.
Садбуруз ам алатналди шад хьана,
Садбуруз ам кутугарна жигьетди.
Фейи йиса гелер тунай чи чанда:
Дердерикай, гъамарикай азад хьуй!
Бахтунин гъед ккlуьрай чи девранда,
Сабур, регьим, инсанвални мурад хьуй!
Намусдикай чешне хьурай уьлкведиз,
Пехилдакай хьайиди туш даях чаз.
Фикир гана жуван ери–бинедиз,
Диде–ватан гьамиша хьуй дамах чаз!
Гьар са касдин кlвалин ери къени хьуй,
Экуь рекьер, экуь фикир кьисмет яз!
Ислягьвилин, шадвилинни мани хьуй!
Кlвале, къеце, гьар сана хьуй гьуьрмет чаз!
Алат хьана мадни са йис
© Copyright: Магомед Мирзоев Мирзой, 2020
Свидетельство о публикации №120010103684
Свидетельство о публикации №120010103684
Рецензии