Вучиз ваз зул дакlан я?

Дак1ан я заз зулун йикъар, дак1ан я,
Кьуьзуь жезва т1ебиатни инсан хьиз.
Дак1ан я заз зулун йикъар, дак1ан я,
Ч1улав цифер пехъи жезва душман хьиз.

Шагьмардан Арран

Вучиз я а ийер суна дакlан ваз,
Вучиз вуна хазва адан хатурар?
Мас гудайла ийердан тlул акван ваз-
Алцур тежен герек лацу ятуррал!

Тlебиатдин гьар са вяде ийер я,
Вилер ава кьатlун тийир, кьатlудай.
Гьар чlавуниз ибур авай шейер я-
Вичин сирер, суьгьуьрди ял атlудай.

Зул тахьайтlа, вядесуз кьуьд атана,
Къаяв гуда тарарамаз бегьерар.
Гвадарда зул гьикl на гъилив атlана-
Санлай хъуьтlуьз элкъведа гад-тегьер ян?!

Дем-мелерни зулуз жеда асулбур,
Гьерекатрик жеда кьуд пад, ргада.
Дакlан лугьуз ша вуна зул къарсурмир,
Хъиле гьатда, чалай са цlар чlугада.

Тlебиатди дегишдайд я вичин хам-
Чун я кьуьзуь жезвайди и дуьняда.
Вуч хъийин мад, а кьил, и кьил гьикl я ам,
Зул батlул туш, дуьня гьихьтин дуьня я.

Цавари вуч кхьенватlа, гьам я чид,
Гьала уьмуьр къулухъ килиг тавуна.
Сад я абруз гьам ажузди, гьам игид-
Вуч гъарайда вуна шел-хвал хъувуна?!

Шаир я вун, гьата ашкъид туруна,
Шиир кхьихь гьуьрийрикай,къушаркай.
Твамир жуван илгьам пери зуруна-
Тесниф ая мани инжи рушаркай.

Вучна эхир ийер тават зулу ваз,
Вучиз икьван ам ви рикlиз цlахан я?
Садра вуна адан кимел илифа-
Ахпа акван лугьудан на дакlан я?. ..
12.10.19 г.