Зи жаваб...

Вуч фаркь ава талыш хьана,лезги,авар...эй чан,
Чун-азербайжанлу,ватан-Азербайжан!
Эли Эмиров(Элэми)"Азербайжанлудин марш"

Лезгидин жаваб:

Эхи ая,чар,а ви винеллайбур акваз заз,
Са жизви амукьдайди я жен зун ви чlалахъ яз.
Ватанда эгер айни ятlа гьахъ дуванар чаз,
Бес куьз чаранай зун на атайдай ава икl кьаз?
Удинни талыш ,татни къырыз,гьакlни авар яз...
Тифлис,Еревандайни катайдаз на лугьуз чан,
Автохтанариз "тах" лугьудай Азербайжан!

Мектебда дидед чlал чиринуз заз хьана гьевес,
Гьяфтед гайитlа сад-кьве сят,зазни жедай бес.
"Ваъ",-гьурра галаз гузва ви назирри вичин "сес":
"Акъвазна жуван лезгивилел,вун жемир икl терс,
Лезгидиз авач хезнеда пул,гьич къачумир гьяз,
"Лезги я зи миллет"ни лугьуз чаз тахьурай ван,
Хьухь азербайжанлу,инар-Азербайжан!"

Дегиш хьана дуьнья,цикlена,ингье,Союзни,
"Демократик уьлке жеда чун",-тир хьи лугьузни.
Лап цин къеневай гъед хьиз ава гьатта урусни,
Гьакlни гила зун хуьзва,умуд буш,вуна гузни...
Ганвай кьве сятдин патахъай гьатнава тlурфан,
Вутl хьан ви мез,авлад лугьудай,Азербайжан?

Вирт-виртни рахаз,"стха" лугьуз хьахьна къилихда,
Амма далудихъ файда жуван гьамиша виликна...
Вахгана катайдаз...зи чилерни,на хиритlна,
"Таржума" авунва хуьрерин тlварни вирид на...
Ихьтин...на гудай "севги" акваз,за веревирдна...
"Туштlа рази,хъвач,им-вун,амайни ви Дагъустан", -
Лугьузва гила,ингье,на заз,Азербайжан!

Вилик эциган зани вуна,ша гила,бармакl,
Авлад ятlа,шартlарни атlун,зазни це зи гьакь.
Хезне лугьудай верцlи тlунутlдиз ая уртах,
Гьинва зи паяр хезнедавай,гьинва бес а хвах?
Авлад ятlа,заз къарши саясатни михьиз твах...
Акl хьайтlа,къведа сидкъи къеняй ваз зи рикlин ван:
Вун я зи ватан,зун-ви хва,чан Азербайжан!

Аз.чlалай элкуьрайди автор вич я.
19.10.18 г.