Шиир тушни?

"Кlубан я зун къе",-лагьана руьгьди заз,
"Къелем къачу гъилиз",-илгьам рахана.
Тади кьуна гъили,кхьиз гьазур яз,
"Квекай?Фикир кlанда...",-кьили лагьана.

Кисна акъваз хьанач,рикlи кушкушна:
"Садра вуна пад-къерехда вил къвекъуьр.
Къведайди я ваз фикирар,алтlушна,
Аквада ваз гьар шеина са фикир".

Килигна зун,ишигъ къвезвай дакlардай,
Чил гьатнава лацу,михьи живеда.
Рахаз хьайтlа, живед ваз сир ахъайда,
Икьван михид вучиз къайи жедатlа.

Аквазва заз шуьшейраллай гиширар,
Къай бубади магьирвилив чlуганва.
Инсандин хва адан патав наши я,
Саки гъетер ви пенжердал чlаганва.

Шиир тушни,сив-тlиш живед акlана,
Бахчад гъенел къугъазавай бицlекар?!
Нуькlер акваз аскан къавал,агъана,
Шиирдин цlар вич хкатда мецикай.

Кlулал чанта, хквезава мектебдай,
Гъвечlи гада, чир жезава ментешвал.
Эхи жезвач хва геж хьайи дидедвай,
Скlам кьецlил акъатнава, пелеш я.

Кlекlец гъиле кьуна физвай кьуьзуь кас,
Ацlукьнава ялар ягъиз,къванцелла.
Куькlуьрзава тембек,кичl туш тум тlакьаз,
Цlразава мурк кватнавай спелар.

Хуртlар гана акъуднава куьчедиз,
Куткузавач худдик машин къуншидин.
Паб хъилева,гъуьлуьхъ галаз гьуьжетиз,
Кхьидайдаз имни фикир тушни,де?!

Жегьил диде хквезава туьквендай,
Галай бицlек гумукьнава гуьгъвена.
Гвай къугъарган кучудуз я тlеквенда,
Гъвечlи перцив хъуьтуьл живер эгьвена...

Гьар са пипlе аквада ваз са сегьне,
Легьзе-легьзе галатзавай уьмуьр я.
Шаир кlанда  и шикилрин бул дегьне,
Са кино хьиз эбеди тан шиирда!..