ЧНА

Я лезгияр,чун авай къар-
Лугьуз зун...куьн...вуна...чна...
Гьакьван хъсан тирни крар-
Лапни хъийиз чlана чна?

Авачирна къал кутуна,
Гъакь-гьуьрметар кьулухъ туна,
Лезги кимин лапни пунал
Гуьлле-патрум яна чна.

Садвиликай рахана чун,
Гару,харци ягъана чун,
Душмандихъни агъана чун-
Багъри чанар кана чна.

Мугъул,гагьни урус чlалал,
Кхьиз,кlелиз,лугьуз чlалар,
Жувахъ авай турус чlалал
Гиманиз,шак гъана чна.

Кlах къуьлуькай жентиз кьечlиз,
Дугъри акваз гьарма...вичиз,
Цlай куькlуьрдай къайда течиз,
Пара кlарас хана чна.

Жувандан фу такваз вилиз,
Килигна чун чарад гъилиз,
Фирсат хьунмаз жуванд кьилиз,
Турба къуьгна,цвана чна.

Ката-галтуг алахъна сад,
Дестек гудай ятlакьна сад,
Хьайтlа са куьхъ агакьна сад,
Алтугна,къван гана чна.

Чун патахъиз парад авай,
Гьич жен тийир,чарадавай-
Хъитlкьендиз,чи арадавай,
Са кун мад хъяна чна.

Квез хъел татуй къе Намиккай-
Лайих яни чаз бес и кар?!
Кьве патавай чи са халкьар-
Женни пайиз хьана-чна?
10.07.18 г.